Radio Sindhuligadhi 92 MHz

फागुन २१ को निर्वाचनलाई लक्षित गर्दै सिन्धुलीमा नमुना मतदान कार्यक्रम सम्पन्न

रेडियो सिन्धुलीगढी, ०९ फागुन २०८२, शनिबार ।

आगामी फागुन २१ गते हुने प्रतिनिधि सभा निर्वाचनलाई लक्षित गर्दै सिन्धुलीमा नमुना मतदान कार्यक्रमको आयोजना गरिएको छ । जिल्लाको कमलामाई नगरपालिका ६ स्थित खम्बे चौरमा जिल्ला सुरक्षा समिति सिन्धुलीको आयोनामा भएको कार्यक्रम शनिबार सम्पन्न भएको हो ।

निर्वाचनका दिन अपनाइने सम्पूर्ण प्रक्रिया र सुरक्षा व्यवस्थाबारे सर्वसाधारणलाई जानकारी गराउने उद्देश्यले नमुना मतदान कार्यक्रमको आयोजना गरिएको थियो । नमुना मतदानलाई वास्तविक निर्वाचनकै स्वरूप दिन महिला, पुरुष, ज्येष्ठ नागरिक तथा अशक्त मतदाताका लागि छुट्टाछुट्टै लाइनको व्यवस्था गरिएको थियो । प्रवेश गर्ने ठाउँमा म्यादी प्रहरी खटिएका थिए । नमुना मतदान मतपेटिकाको सुरक्षाका लागि नेपाल प्रहरी खटिएका थिए ।

मतदान केन्द्रमा हुन सक्ने सम्भावित भीड व्यवस्थापन र सुरक्षाका उपायबारे पनि अभ्यासमार्फत प्रदर्शन गरिएको थियो । कार्यक्रममा नेपाली सेना, सशस्त्र प्रहरी बल र नेपाल प्रहरीले संयुक्त रूपमा भीड नियन्त्रण सम्बन्धी ‘डेमो’ प्रस्तुत गरेका थिए ।

कार्यक्रममा मुख्य निर्वाचन अधिकृत कमलराज बिष्ट, प्रमुख जिल्ला अधिकारी स्किम श्रेष्ठ, जिल्ला प्रहरी कार्यालय सिन्धुलीका प्रहरी उपरीक्षक लालध्वज सुवेदी लगायत जिल्लास्थित सुरक्षा निकायका प्रमुख तथा विभिन्न कार्यालयका प्रतिनिधिहरूको उपस्थिति रहेको थियो ।

May be an image of one or more people and text