Radio Sindhuligadhi 92 MHz

दुध तथा दुग्धजन्य पदार्थको आफुखुसी मूल्य वृद्धि नगर्न व्यापारीहरुलाई जिल्ला प्रशासन कार्यालय सिन्धुलीको आग्रह

रेडियो सिन्धुलीगढी, २८ भदौ २०८३, आईतबार ।

जिल्ला प्रशासन कार्यालय सिन्धुलीले दुध तथा दुग्धजन्य पदार्थको मूल्य आफूखुसी वृद्धि गरी बिक्री वितरण नगर्न व्यापारीहरूलाई आग्रह गरेको छ । नजिकिदै गरेको चाडपर्वलाई लक्षित गरी आफु खुसी मूल्य बढाएर बिक्री वितरण गरी उपभोक्ताको हक हित विपरीतको कार्य गरेको गुनासो प्राप्त भएपछि जिल्ला प्रशासन कार्यालय सिन्धुलीले हिजो (शनिबार) एक सूचना जारी गर्दै व्यापारीहरुलाई यस्तो आग्रह गरेको हो ।

नेपाल सरकार वा सम्बन्धित निकायको आधिकारिक निर्णयबिना दुध वा दुग्घ व्यवसायसँग सम्बन्धित कारोबार गर्ने व्यापारिक फर्म, कम्पनी, व्यक्ती वा संस्थालाई आफूखुसी मूल्य वृद्धि गरी कालोबजारी, उपभोक्ताको हक हित संरक्षण विपरितका कार्य नर्गन सूचनामा भनिएको छ । यस्तो कार्य गरेको पाईएमा कालोबजारी तथा सामाजिक अपराधका रूपमा प्रचलित कानुनबमोजिम कारबाही गरिने कार्यालयले जनाएको छ ।

दुध तथा दुग्ध व्यवसायसँग सम्बन्धित कुनै गुनासो वा उजुरी भए लिखित, मौखिक, इमेल, फोन वा स्वयं उपस्थित भएर जानकारी गराउन प्रशासनले सर्वसाधारणलाई सुचना मार्फत अनुरोध गरेको छ ।

May be an image of text