Radio Sindhuligadhi 92 MHz

कमलामाई १२ मा नेकपाका २ दर्जन कार्यकर्ता एमालेमा प्रवेश

सिन्धुली । आगामी फागुन २१ गते हुने प्रतिनिधिसभा सदस्य निर्वाचन नजिकिँदै गर्दा सिन्धुलीमा नेपाली कम्युनिष्ट पार्टी (नेकपा) का करिब दुई दर्जन स्थानीय कार्यकर्ताले पार्टी परित्याग गरि नेकपा एमालेमा प्रवेश गरेका छन् ।

क्षेत्र नं. २ अन्तर्गत सिन्धुलीको कमलामाई नगरपालिका १२ फलामेमा आयोजित पार्टी प्रवेश कार्यक्रममा एमालेका प्रतिनिधिसभा सदस्य पदका उम्मेदवार मनोजंग थापाले नवप्रवेशीलाई अबिर र खादा लगाएर स्वागत गर्नुभएको थियो ।

प्रवेश गर्ने कार्यकर्ताहरूले विगतमा निर्वाचित जनप्रतिनिधिहरू जनतासँग सम्पर्कविहीन भएको, स्थानीय समस्याप्रति बेवास्ता गरेको र चुनावी प्रतिबद्धता पूरा नगरेको आरोप लगाउँदै नेकपा माओवादी केन्द्र हुँदै हालको नेकपासम्म असन्तुष्टि बढेको बताएका छन् । सोही कारण आफूहरूले विद्रोह गर्दै नयाँ विकल्प रोजेको उनीहरूको भनाइ छ ।

कार्यक्रममा उहाँले क्षेत्र नं. २ विकासका दृष्टिले पछाडि परेको बताउँदै अबको जितपछि विकास, सुशासन र जनतासँग प्रत्यक्ष सम्बन्धलाई प्राथमिकतामा राख्ने प्रतिबद्धता व्यक्त गर्नुभयो ।