रेडियो सिन्धुलीगढी, ०८ भदौ २०८३, सोमबार ।

महिला अधिकारको क्षेत्रमा क्रियाशील सिन्धुलीका सात वटा संगठनले महिला तथा बालबालिकामाथि भइरहेका बलात्कार, हत्या र लैङ्गिक हिंसाका घटना रोक्न माग गर्दै गृह मन्त्रीलाई ज्ञापनपत्र बुझाएका छन् ।

सोमबार अन्तरपार्टी महिला सञ्जाल, नेपाल महिला संघ, अनेमसंघ, अखिल नेपाल महिला संगठन, महिला मानवअधिकार रक्षक सञ्जाल, क्रियाशील पत्रकार महिला सिन्धुली र महिला अधिकारका राष्ट्रिय अभियान सिन्धुलीका अध्यक्ष तथा प्रतिनिधिहरुले सहायक प्रमुख जिल्ला अधिकारी मार्फत गृह मन्त्रीलाई ज्ञापन पत्र बुझाएका हुन् ।

सातै संगठनका अध्यक्ष तथा प्रतिनिधिले हस्ताक्षर गरेको ज्ञापनपत्रमा सिन्धुलीसहित देशभर महिला तथा बालबालिकामाथि भइरहेका बलात्कार, हत्या तथा लैङ्गिक हिंसाका श्रृङ्खलाबद्ध घटनाले समाजलाई स्तब्ध, भयभीत र आक्रोशित बनाएको उल्लेख गरिएको छ ।

ज्ञापनपत्रमा बाराको जीतपुरसिमरा उपमहानगरपालिका १ दशधुरेकी तीन बर्षीया गरिमा चौधरीमाथि छिमेकीद्धारा बलात्कारपछि गरिएको हत्या, सप्तरीको दुई बर्षीया खुसी खातुनको आफ्नै सौतेनी आमाबाट भएको हत्या, जिल्लाको गोलन्जोर गाउँपालिकाकी ६ बर्षीया बालिकामाथि भएको बलात्कार प्रकरणमा पीडक पक्राउ परेपछि छुट्याईएको घटनाले न्याय प्रणाली र अनुसन्धान गर्ने निकायप्रतिको जनविश्वासमा गम्भीरप्रश्न उठाएको संगठनहरूको भनाइ छ । यस्ता घटनाले अपराधीलाई संरक्षण हुने र पीडितले न्याय नपाउने चिन्तालाई थप गहिरो बनाएको ज्ञापनपत्रमा उल्लेख छ ।

सिन्धुलीमा पनि आर्थिक बर्ष २०८२ /८३ को एक बर्षमा १ सय १ जना बालबालिका र १ सय ३१ जना महिला हराएका छन् । यहि अवधिमा २० वटा बलात्कार, ३ वटा बटा बलात्कार प्रयास, ४ वटा बाल यौन दुव्र्यवहारका घटना भएको ज्ञापन पत्रमा उल्लेख गरिएको छ । 

१ सय १७ वटा घरेलु हिंसाका घटना प्रहरीमा दर्ता भएका छन् । साथै महिलाहरुको जघन्य प्रकारले हत्या गरिएका चार वटा घटना भएका छन् । यी तथ्याङ केबल संख्या नभएर समाजको सुरक्षा, न्याय र उत्तरदायित्वमाथिको गम्भीर चुनौती रहेको संगठनहरूले बताएका छन् ।

यस्ता जघन्य घटनापछि सरकार वार्ता, सहमति र आश्वासनमा सीमित भएको अनुभुति नागरिकले गरेका उल्लेख गर्दै राज्यको दायित्व केबल अपराधपछि प्रतिक्रिया जनाउनु नभई दण्डहिनताको अन्त्य गर्दै नागरिकलाई सुरक्षित महशुस गराउँने वातावरण निमार्ण गर्नु रहेको ज्ञापन पत्रमा उल्लेख गरिएको छ ।

संगठनहरूले महिला तथा बालबालिकामाथि हुने हिंसा अन्त्यका लागि सरकारसमक्ष सातबुँदे मागसमेत राखेका छन् । उनीहरूले बलात्कार, हत्या तथा यौनजन्य हिंसाका जघन्य अपराधमा संलग्न व्यक्तिलाई तत्काल पक्राउ गरी प्रचलित कानुनबमोजिम अधिकतम सजाय सुनिश्चित गर्न माग गरेका छन् ।

बालबालिका पीडित भएका घटनामा कुनै पनि राजनीतिक, सामाजिक, आर्थिक वा अन्य प्रभावबाट मुक्त भई निष्पक्ष, वैज्ञानिक र समयबद्ध अनुसन्धान गर्न तथा घटनामा प्रत्यक्ष वा अप्रत्यक्ष रूपमा संलग्न, प्रमाण लुकाउने वा अपराधीलाई संरक्षण गर्ने जोसुकैलाई कानुनी दायरामा ल्याउन उनीहरूको माग छ ।

त्यसैगरी, महिला तथा बालबालिका हराउने घटनाको खोजतलास, उद्धार र पुनःस्थापनालाई उच्च प्राथमिकता दिँदै प्रभावकारी खोज तथा अनुसन्धान संयन्त्र निर्माण गर्न, राज्यका विभिन्न निकायबीच आवश्यक समन्वय र सहकार्य सुनिश्चित गर्न र प्रत्येक जिल्लामा लैङ्गिक हिंसा नियन्त्रण, पीडित संरक्षण, मनोसामाजिक परामर्श तथा कानुनी सहायताका सेवा थप सुदृढ बनाउन माग गरिएको छ ।

अनुसन्धान निकायको जवाफदेहिता बढाई अनुसन्धानमा ढिलासुस्ती वा लापरवाही गर्ने जिम्मेवार अधिकारीमाथि समेत आवश्यक कानुनी कारबाही गर्नुपर्ने माग संगठनहरूको छ ।

यस्तै, विद्यालय, क्याम्पस, समुदाय, स्थानीय सरोकारवाला तथा स्थानीय तहसँग समन्वय गरी बाल संरक्षण र लैङ्गिक हिंसा न्यूनीकरणका लागि व्यापक सचेतनामूलक कार्यक्रम सञ्चालन गर्न पनि सरकारसँग आग्रह गरिएको छ ।

ज्ञापनपत्रमा भनिएको छ, “महिला तथा बालबालिकाको सुरक्षा कुनै एक समुदाय वा संस्थाको मात्र सरोकार होइन । यो लोकतान्त्रिक राज्यको आधारभूत जिम्मेवारी हो । न्यायमा ढिलाइ हुनु भनेको न्यायबाट वञ्चित हुनु हो भन्ने सिद्धान्तलाई आत्मसात् गर्दै पीडितले शीघ्र, निष्पक्ष र प्रभावकारी न्याय पाउने व्यवस्था गर्न हामी सरकारसँग दृढतापूर्वक आग्रह गर्दछौँ ।”

स्वर्णिम भविष्य बचत तथा ऋण सहकारीको १८ औँ वार्षिक साधारण सभा सम्पन्न

रेडियो सिन्धुलीगढी, १३ भदौ २०८३, शनिबार । स्वर्णिम भविष्य बचत तथा ऋण सहकारी संस्था लिमिटेडको १८ औँ वार्षिक साधारण सभा सम्पन्न भएको छ । संस्थाका

जिल्ला स्तरीय विपद् व्यवस्थापन समितिको बैठक सम्पन्न, बाढीमा बेपत्ताभएकाहरुको उद्धारमा जुट्न आग्रह

सिन्धुली, १२ भदौ २०८३, शुक्रबार । रसुवाको भोटेकोशी, त्रिशुली हुँदै नारायणी नदी तटीय क्षेत्रमा आएको विध्वंसकारी बाढीले पु¥याएको आर्थिक, भौतिक तथा

रसुवा बाढीपीडितका लागि सिन्धुलीका दुई विद्यालयद्वारा सहयोग

सिन्धुली, ११ भदौ २०८३, बिहिबार । रसुवाको भोटेकोसी नदीमा आएको विनाशकारी बाढीबाट प्रभावितहरूको उद्धार तथा राहतका लागि सिन्धुलीका दुई विद्यालयले