Radio Sindhuligadhi 92 MHz

तीनपाटनमा पालिका स्तरीय प्रथम खुल्ला पुरुष डबल व्याडमिन्टन प्रतियोगिता संचालन हुने

रेडियो सिन्धुलीगढी, २७ जेठ २०८१, आईतबार ।

सिन्धुलीको तीनपाटन गाउँपालिकामा पालिका स्तरीय प्रथम खुल्ला पुरुष डबल व्याडमिन्टन प्रतियोगिता संचालन हुने भएको छ । गाउँपालिकाको आयोजना तथा गाउँपालिका खेलकुद विकास समितिको सहजीकरणमा प्रतियोगिता संचालन हुन लागेको हो ।

प्रतियोगिता भोलि सोमबार र पर्सि मंगलबार गाउँपालिकाको कार्यालय परिसरमा रहेको खेलमैदानमा संचालन हुने छ । प्रतियोगितामा ए लेभल तर्फ प्रथम हुनेलाई नगद २० हजार, द्धितीय हुनेलाई १५ हजार र तृतीय हुनेलाई १० हजार सहित शिल्ड, मेडल र प्रमाण पत्र प्रदान गरिने छ भने बि लेभल तर्फ प्रथम हुनेलाई १५ हजार द्धितीय हुनेलाई १० हजार र तृतीय हुनेलाई ५ हजार सहित शिल्ड, मेडल र प्रमाण पत्र प्रदान गरिने छ ।

प्रतियोगितामा सहभागी हुनका लागी पालिकाको खेलकुद विकास समितिको सचिवालयमा तोकिएको मापदण्ड पुरा गरि नागरिकताको प्रतिलिपि अथवा नागरिकता नहुने खेलाडीको हकमा जन्म दर्ताको प्रतिलिपि सहति अस्ति शुक्रबार सम्म टिम दर्ता गर्न आग्रह गरिएको थियो । प्रतियोगिताको उद्घाटन भोलि बिहान ७ बजे गरिने गाउँपालिकाले जनाएको छ ।