Radio Sindhuligadhi 92 MHz

स्कुटर र मोटरसाइकल चोरी मुद्दाका फरार प्रतिवादी एक वर्षपछि पक्राउ

रेडियो सिन्धुलीगढी, २५ भदौ २०८३, बिहिबार ।

स्कुटर र मोटरसाइकल चोरी मुद्दामा अदालतबाट कैद तथा जरिवाना तोकिएपछि फरार रहेका एक प्रतिवादीलाई जिल्ला प्रहरी कार्यालय सिन्धुलीबाट खटिएको प्रहरी टोलीले पक्राउ गरेको छ । पक्राउ पर्नेमा कमलामाई नगरपालिका ७ निवासी २३ वर्षीय काले भनिने दीपक योञ्जन रहेका छन् ।

योञ्जनलाई सिन्धुली जिल्ला अदालतले २०८२ भदौ ८ गते स्कुटर चोरी मुद्दामा १ वर्ष कैद र १० हजार रुपैयाँ जरिवाना तोकेको थियो । त्यस्तै, २०८२ भदौ १ गते सोही अदालतको अर्को फैसलाले मोटरसाइकल चोरी मुद्दामा समेत १ वर्ष कैद र १० हजार रुपैयाँ जरिवाना तोकेको थियो ।

अदालतको फैसलापछि कैद तथा जरिवाना भुक्तान नगरी फरार रहेका योञ्जनलाई प्रहरीले बुधबार पक्राउ गरेको हो । पक्राउ परेका योञ्जनलाई आवश्यक कानुनी कारबाहीका लागि सिन्धुली जिल्ला अदालतमा पठाइएको जिल्ला प्रहरी कार्यालय सिन्धुलीले जनाएको छ ।