Radio Sindhuligadhi 92 MHz

तीनपाटनमा संचालन भएको निशुल्क दन्त शिविरमा ११ सय बढिले सेवा लिए

रेडियो सिन्धुलीगढी, १ पुष २०८१, सोमबार ।

सिन्धुलीको तीनपाटन गाउँपालिकामा निशुल्क दन्त शिविर सम्पन्न भएको छ । गाउँपालिकाको आयोजना तथा समाज डेण्टल हस्पिटल, नयाँ बानेश्वर काठमाडौको प्राविधिक सहयोगमा संचालन भएको दन्त शिविर आज सोमबार सम्पन्न भएको हो ।

मंसिर २९ गते शनिबार र ३० गते आईतबार वडा नम्बर ११ मा रहेको प्राथमिक स्वास्थ्य केन्द्र लाम्पनटारमा संचालन भएको शिविरमा ७ सय ८३ जना दाँत सम्बन्धी समस्या भएका विरामीहरुले सेवा प्राप्त गरेका गाउँपालिकाका प्रमुख प्रशासकिय अधिकृत टंक बहादुर नेगीले जानकारी दिनु भयो ।

साथै, आज सोमबार वडा नम्बर १ मा रहेको प्राथमिक स्वास्थ्य केन्द्र बेलघारीमा विहान ८ बजेदेखि बेलुका ४ बजेसम्म संचालन भएको शिविरमा ३ सय ७८ जनाले सेवा लिएका स्थानीय कृष्ण अधिकारीले जानकारी दिनु भयो ।

गाउँपालिकामा दाँत सम्बन्धी समस्या भएका बिरामीहरुलाई सेवा प्रदान गर्ने उदेश्यले शिविरको आयोजना गरिएको गाउँपालिकाका अध्यक्ष कर्ण बहादुर मगरले जानकारी दिनु भयो ।

विगत ३ दशक देखि सेवा प्रदान गरेको समाज डेन्टलले दाँत सफा गर्ने, दाँत भर्ने, दाँत निकाल्ने र नयाँ दाँत हाल्ने साथै अन्य औषधीजन्य सामग्री वितरण गर्ने अभियानले आगामी दिनमा पनि आफ्नो ठाउँमा यस्ता कार्यहरु गर्न आफु प्रतिबद्ध रहेको प्रतिनिधि सभा सदस्य श्याम कुमार घिमिरेले बताउँनु भयो ।

शिविरमा उपलब्ध नभएका सेवाहरु लिनका लागी समाज डेण्टल हस्पिटल काठमाडौ आएमा विशेष छुट सहित सेवा दिईने समाज डेण्टल हस्पिटल काठमाडौका व्यवस्थापक सविन घिमिरेले बताउँनु भयो । मुुख तथा दन्त रोग विशेषज्ञ चिकित्सक र अन्य २१ जना प्राविधिकहरुको टिमले उक्त शिविरमा सेवा प्रदान गरेका थिए ।

शिविरमा तीनपाटन गाउँपालिका १ का वडा अध्यक्ष गोविन्द रायत, वडा नम्बर २ का वडा अध्यक्ष मु्कुन्द प्रसाद पौडेल, वडा नम्बर ३ का वडा अध्यक्ष लाल बहादुर स्याङ्तान लगायत जनप्रतिनिधि, कर्मचारी लगायत स्थानीयहरुको उपस्थिति रहेको थियो ।